االسلام عليكم
ا
زي ما نحن عارفين الشماسه ديل عندهم مصطلحات ما أنزل الله بها من سلطان وعشان ما تدقس مع واحد منهم نديكم بعض الكلمات عشان تقدرو تتعاملو معاهم واللي بيعرف ما يخجل عادي يورينا (بيني وبينكم انا لقيت روحي بقول اكتر من خمسة كلمات في كلامي ) ..:وعموما دي بقت اللغة الماشة بين الشباب بنات واولاد في السودان .... انا شخصيا بتضحكني والاخترعا دا ما نصيح ,انتا رايك شنو؟؟؟الجلك :: مقصود بيها الاب ( للاسف ) او الشخص الكبير والانثى ( جلكينه ) ...
الضحاكات :: مقصود بيها القروش وطبعا القروش بتسبب الضحك ..
سلفادور :: مقصود بيها سلف او دين ( يافرده داير لي ضحاكات سلفادور ) ...
عائشه الفلاتيه :: مقصود بيها العشاء (أسمع ياعمك عائشه الفلاتيه وين وشنو ؟؟)
العضه :: مقصود بيها الاكل (امشي اعضي واجيكم يا فرد) ..
كسير التلج :: دي بتتقال لما الشماسي يحس انو الزول القدامو بدافع عن زول صاحب مكانه مرموقه او مرتاح ماديا فبقول ليه ( ما تكسر تلج ) وبتتستعمل كمان لما الواحد يتعامل مع بنت بصورة رقيقه وبحاول يكسب ودها فبقولو عليه ( بكسر تلج )..
الحديده :: مقصود بيها العربيه..
ا
الهواء ضربك :: مقصود بيها انك بقيت ولا حاجه..
مرطب :: مقصود بيها المرتاح ..
فنان :: مقصود بيها الزول الكضاب ( الزول ده فنان خلاص ) ..
فتيحاب :: المعروف انه الفتيحاب ده حي في الخرطوم لكن هنا بستعملوها للزول المشى او الجرى من حاجه ( الزول ده عمل فتيحاب ) ..
شتات :: مقصود بيها انا ماشي ( يلا يا حبه انا شتات او مشتت )..
الحنك :: مقصود بيها الكلام ..
الوهمة :: مقصود بيها البرنامج ( يافرده الوهمة شنو ؟؟ ) او الموضوع (ياعمك الوهمة ماكده انت فاهم غلط ) ...
معاط :: مقصود بيها الزول الكلامه كتير ( الزول ده معاط جنس معاط )..
جر زمن :: مقصود بيها تضيع زمن ( تعال نجر زمن في النادي )
جامد :: بستعملوها لما تعجبهم حاجه ( الحديده دي جامده خلاص ) او لما يتفقو على حاجه ( بجيك بعدين , جامد ياعمك منتظرك )
جوة الجك :: يعني ماشي معاكم الحته الفلانيه ( ماشين السينما , جوة الجك طوالي )
نوبيرا :: مقصود بيها النوم ( انا ماشي اركب النوبيرا ) ماشي انوم خخخخخخخخخ...
كبــس :: مقصود بيها جاء او وصل ( زولك المعاط كبس )
بلف :: مقصود بيها الكمساري ( يابلف ادينا الباقي )
خوجلي عثمان :: مقصود بيها خجلان شديد ( يامعلم الزول ده مالو خوجلي عثمان كده)
فاطمه الجعلي :: مقصود بيها الفطور..
عمر احساس :: مقصود بيها متحسس شوية ولا حساس ( الزول ده عمر احساس جليهو )
الطرب :: مقصود بيها الحفلات ( الليله الطرب وين وبمنو )..
السان :: مقصود بيها الزول ( السان ده منو ) وللانثى ( السانه دي تبعك ؟؟)..
شديده قاطعه + نار منقد :: مقصود بيها البت السمحه ( السانه دي شديده قاطعه ) (ياخي نار منقد بس)
ضهب + نحل + مظلات + كواكب + دبايب + ضفادع :: مقصود بيهم الزول المامعزوم ..
ماشه معاك بالكبري الجديد :: مقصود بيها امورك ماشه عال العال ..
زغبير :: مقصود بيها الزوغه او الهروب ...
الطارة :: مقصود بيها البوليس ..
غطى جالون :: مقصود بيها تمام التمام ( خبرك ياعمك , غطى جالون ياقريبك )
كاسر كرونا :: مقصود بيها الزول العاطل وقاعد بدون شغله ...
الشرتيت :: مقصود بيها القروش ..
قاعد كنب :: مقصود بيها قاعد ساي ( الزول ده قاعد كنب )...
جدعه الف :: مقصود بيها حاجه استايل او حاجه سيستم ..
نكت شماسيه ..واحدة عملت الحبيب بورقيبة ( حبت ليها واحد)... قام الواحد عمل الضوء قدم الخير (أتقدم لأهلها)....
وأهلها لما عرفوا انو ما عامل كمال شغيل (ماشغال)
... عملوا ليه الجزيرة أبا ( رفضوهو).... الاثنين قاموا عملوا الضوء الشارد (اخدو بعض وشردو )...
وعملوا عقد الجلاد (عقد جواز )... أم البت عرفت الخبر عملت احمد الدوخي (داخت واغمى عليها ...
لو الموضوع فيصل العجب بنعمل ليكم كمال حامد ..
الترجمه :: لو الموضوع عجبكم بنكملو ليكم خخخخخخخخخخخ