إن شاء الله القيامة تقوم ؟؟؟؟؟؟ H

اهذه مجادعة بين إثنين الأول تقدم الأول لخطبة بنت فرفضته فأنشد قائلاً :
عشان ريدك معاي ما بدوم
ناس سهرانة طوالي
وناس طول الليالي تنوم
أشوف انا كيف حسابك يطول
على الوعدالدوام ممطول
وانا الشايف كتير أحباب
بعيشو الريدة عرض وطول
أنا الشايل دوام همك
وأريدك ريدة زي أمك
وأغير من غيرتي زاتا عليك
أخاف أنا يا الخفيف دمك
ان شاءالله القيامة تقوم
وكل زول يمشي في حالو
عشان ما قلبي يرجع يقول
حبيب الدنيا في بالو
كان ممكن الحكاية تنتهي عند هذا الحد
لكن أخونا الدكتور أحمد فرح شادول قال لي
أبداً الحكاية دي ما حصلت لزميلك
دي حاصلة ليك انت
وقام عمل قصيدة هاجمني بيها

فرد عليه الآخر وهو دكتور قائلاً:

ان شاء الله الحسادة تطير
وتمتد السعادة تدوم
والضاق العذاب في الريد
بكرة يعيش ويشبع نوم
وتقول القيامة تقوم؟؟
عشان حظك شقي ومشئوم
وفتحن ليك بنات حواء
وجافاك ليلة واحدة النوم
بتقول القيامة تقوم؟؟
أنحنا لا عرفنا الريد
ولا زيّك عشقنا الغيد
وحبينا القريب وبعيد
وراجعنا القديم وجديد
ولا ضمانا حضن الليل
مع الوجه البهي وغريد
ولا لليل شكينا حبيب
اذا حتى العشقنا عنيد
ولا نظمنا في الحلوات غنا وموال
درر وقصيد
ولالينا بن عوف غنا
لا الصابر ولا الباكي
خيالِك عندي يوماتي
صباح خيري ومساء أفراحي
أعد ميعادو باللحظات
وسهري معاه صباحي
عيونِك فوق عيوني تنوم
وفوق آلامي ترتاحي
وريدِك من عواتي الريح
المو وأضم عليو جناحي
وتقول القيامة تقوم؟؟
أنحنا مع السعادة نسير
مواكب فرحة هادرة هدير
نحيا نحب نعيش ونغير
ونعلن ثورة التغيير
ناكل حب
ونشرب حب
ونلبس حب
ونفرح بالمحبة نطير
نعيش الريدةعرض وطول
كبيرنا ملك صغيرنا أمير
وتسمع صوت هتافنا يجيك
ان شاء الله الحسادة تطير
وتكبر وتنسى يا زغبير

رد الأول :
ان شاءالله القيامة تقوم
وعشمي في الله ما شويّة
أدخل جنة المأوى
وهناك يدوني حورية
أتكي في الارائك أنووووووم
بكل حبور وحرية
وأرتاح من ده مافي وقوم
وأمش جيبلي وجيب ليّا
أفارق دنية المعدوم
والقى مطالبي بالنية
ولوحنيت للحم الطير
تجيني الطيرة مشويّة
عشانك كيّة يا دكتور
تكون حوريتي خمرية
تجرجر ديسا ده المردوم
ولهجتا خالصة عربية
أخلي ليك بنات حواء
تحاحي صباح وعصرية
وتبقى عواطلي يا دكتور
هناك لا مرض ولا شكيّة
هناك لا أذن سمعت
ولابعيونا مرئية
هناك حتى الرحيق مختوم
وولدان طائفة دوريّة
لا عشوائي في الخرطوم
ولا صفقات تجارية
صفي النية يا مهجوم
بلاش هجمات هبوبية
وان شاء الله القيامة تقوم
وتنجح مية في المية

رد الشاعر الدكتور :
ما مقبولة اعذارك
وما معروف مصيرك وين
وماهي صالح اعمالك
عشان يدوك حوراً عين
لو انت على الصراط ماشي
وشركوا ليك ببنية
حا تختل كل حساباتك
وحا تحتل حتلة ابدية
أما لو ضرب حظك
وجابوا ليك بنات الحور
تموت واقف على طولك
ويشيلك حيلك المشلول
وتتلفت يمين وشمال
مشدوه بالجمال مبهور
وتحتار باقي عقلك طار
فيمن يهوي او يختار
ديك قواما سمهر وطول
وديك دعج العيون مكحول
وديك جمالا يسبي عقول
وديك من فيها حلو القول
ودييييييييييييييييك خليها لي شادول
وديك شعراً كمان خلي
قدر ما يزيد نعومة وطول
عذابنا وليلنا فيه يطول
وديك خشيما بنقط كلام معسول
تقيف مشدوه وتفوت القيامة عليك
واقف انت تتلفت طرب وذهول
حسن دنياك للزي ديل
وديل يا صاحبي هم دنياك
يودّنك ويجيبّنك
ويختنّك ويشيلنك
يجلبّنك ويبيعّنك
يغسلّنك ويشرّنك
ويدفنّنك ويكتلنك
يقيدو النار يشدّنك
ويبرن عودك المسلوب يحرقنّك
تفوح انت ويزيد دنّك
وتغني الدنيا بي فنك
ده حال الدنيا
ما بتدوم
مرة تلام ومرة تلوم
ويوم تتعب
مرة تحب وتشبع حب
ومرة تحب وما تنحب
حسن خليهم السمعوك وارجع لحلوكلامك
معقولة القيامة تقوم
قبل ماتلقى احلامك

» قال تعالى{الذين ءامنوا وتطمئن قلوبهم بذكر الله ألا بذكر الله تطمئن القلوب}صدق الله العظيم
» مشاهد من يوم القيامة
» اعظم اهوال يوم القيامة
» وفاة الرسول صلى الله عليه وسلم وخلفاءه الأربعة رضي الله عنهم وأرضاهم
» رثاء الصديق (رضى الله عنه ) للحبيب صلي الله عليه وسلم