منتديات الشيخ ابوقرون
مرحبا عزيزي الزائر اذا كانت هذه اول زايرة لك الرجاء اضغط على ( التسجيل)
نتمنى ان تشاركونا ولكم منا الود والاحترام
الادارة

منتديات الشيخ ابوقرون

منتدى ديني اجتماعي ثقافي اكاديمي تفاعلي يهتم بشؤون منطقة الشيخ ابوقرون وتطوير المنطقة
 
الرئيسيةالبوابةاليوميةس .و .جبحـثالتسجيلدخول
ارجو التصويت على العضو المميز للاسبوع من خلال المنتدى العام
منتديات الشيخ ابوقرون تتمنى عاجل الشفاء للاستاذ صلاح بن البادية وانشاء الله في ميزان حسناته
الاعضاء الاعزاء : تم ادراج قائمة الدردشة اسفل واعلى الصفحة الصفحة للتواصل بين الاعضاء ولكم جزيل الشكر
سلامات العضو الفعال ميدو ابوقرون بوصوله الى ارض الوطن نتمنى له حياة دراسية سعيدة
المواضيع الأخيرة
» ملل القلوب
الإثنين فبراير 22, 2010 12:50 am من طرف القروي

» تعالوا جادعوا يا أهل السدار
الأحد فبراير 21, 2010 11:41 pm من طرف عبده إدريس

» إقتراح بنظافة وتشجير الحلة
الأحد فبراير 21, 2010 4:44 am من طرف ابوعبيده

» مجادعات منوعة
الأحد فبراير 21, 2010 3:49 am من طرف مصطفي ابوقرون

» إقتراح بنظافة وتشجير الحلة 2
السبت فبراير 20, 2010 10:18 pm من طرف القروي

» تم اغلاق المنتدى والانتقال للمنتدى الجديد
السبت فبراير 20, 2010 6:17 am من طرف ابوعبيده

» ممن تؤخذ الحكمة ؟
السبت فبراير 20, 2010 5:17 am من طرف القروي

» ديوك العدة الثلاثة
السبت فبراير 20, 2010 2:59 am من طرف بت ود الأمين

» تعالوا نتعرف علي بعض
الجمعة فبراير 19, 2010 4:38 am من طرف القروي

تصويت
العضو المميز للاسبوع
ايماء احمد ابوقرون
18%
 18% [ 4 ]
مصطفى ابوقرون
36%
 36% [ 8 ]
ميدو ابوقرون
45%
 45% [ 10 ]
المحاسبي سعد ابوقرون
0%
 0% [ 0 ]
خالد القرجي
0%
 0% [ 0 ]
مجموع عدد الأصوات : 22
احصائيات
هذا المنتدى يتوفر على 101 عُضو.
آخر عُضو مُسجل هو مجاهد البدري فمرحباً به.

أعضاؤنا قدموا 5099 مساهمة في هذا المنتدى في 1100 موضوع
دخول
اسم العضو:
كلمة السر:
ادخلني بشكل آلي عند زيارتي مرة اخرى: 
:: لقد نسيت كلمة السر

شاطر | 
 

 لوماكنت سوداني !!!

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
رحمة الله ابوقرون
عضو خبير
عضو خبير
avatar

عدد المساهمات : 431
نقاط : 6619
السٌّمعَة : 0
تاريخ التسجيل : 23/09/2009
العمر : 51
الموقع : شركة بترودار لعمليات البترول

مُساهمةموضوع: لوماكنت سوداني !!!   الثلاثاء ديسمبر 01, 2009 4:12 pm

تخيل كيف يكون الحال لو ما كنت سوداني
ا

كنت حا تلتزم بالمواعيد - كنت ح تدفع فاتورة المحامي او الطبيب قريبك كنت قاضيت المهندس اللي خرب ليك بيتك - كنت عملت مشروعك بنفسك دون محاكاة - كنت بدأت دوامك في الموعد المحدد.
كنت حتنطق حرف ال (ق ) و ال ( غ ) كما ينبغي وما كنت حا تقول للتسعة تزعة
كنت بطلت تسف ساعوط - كنت صرت متخصص وعالم في مجالك
- كنت حتلبس شيك جدا عند خروجك أمام التلفاز وأجهزة الاعلام - كنت تتحدث بطلاقة وإنسيابية بدون أ أ أ أ أ أ–
ولو ما كنت سودانى كنت عرفت ان باللدقيقة 60 ثانية وبالساعة 60 دقيقة وباليوم 24 ساعة وفي اليوم ممكن تعمل كذا وتنجز كذا
وكنت خططت لحياتك ومستقبلك و كنت اخترت المساق التعليمي بنفسك و درست الجامعة بالكلية اللي تناسب مقدراتك ومواهبك ورغباتك المستقبلية مش عشان ود جيرانكم اختار الكلية دى بالزات يعنى اخنق فطس..
كنت ح تتصل بالتلفون قبل زيارة أحد في منزله بدري شويه, مش و أنت في خشم الباب ده طبعا لو اتصلت وما جيت داخل زي قدر الله بدون حتي ماتدق الباب وتدقو ليه؟؟مش في سلك تجرو وتدخل!!بدون مراعاة لحرمة البيت
ولو ما كنت سوداني...كنت انتظرت دورك في الصف وخلصت معاملتك بنظام بدل الململة البتعملوها وكنت ح تنهر أولادك لما يبهدلوا ليهم بيت زول ويعيثوا فيهو فسادا وحضرتك قاعد تضحك ومتعوجب لي اولادك ورافع لي ناس البيت الضغط والسكري....كنت حا تتوقع بحصل شنو لما ترقد طفلك الصغير بدون بامبرز في سرير في بيت ناس!!واولادك الاكبر شوية بعملو شنو في نباتات وازهار الناس التعبانين عليها وزارعنها وراوينها بي دم قلبهم ..والطامة الكبري لو كان عندهم حوض سمك ...
و كنت ح تتردد في أخذهم معاك المرة الجاية لنفس البيت, علشان يبهدلوه مرة تانية...كنت ح تتردد في إعطاء رقم تلفون أو عنوان شخص ما.. دون إذنه او حتي سؤاله اذا كان عندو رغبة يتواصل مع الناس ديل أو مفهمم انو ما عندوا تلفون من اصلو بدل تورطو وتحرجو كدة!!!.وكنت امتنعت عن السماح بجلوس طفلك الرضيع في المقعد الأمامي على حجر والده او والدته ولمن يحصل حادث الحبيب ياكلها لا لذنب جناهو سوي انو اهلو سودانين!!...كنت ح تترد في زيارة شخص في. أنصاص الليالي و صابح تاني يوم مدارس و عمل وتساهر بالناس وتطلع روحهم تشرب العصير والشاي ويعملو ليك العشاء علي امل انك تمشي وتخليهم ينومو وانت برضو قاعد تبرأ فيهم وما تحس الإ قبل آذان الفجر بشوية وتقوم تنكشح بعد ما الديك قرب يعوعي!!!
ولو ما كنت سوداني ...كنت ح تخلي الصغار في البيت عندما تكون المناسبةمناسبة كبار..-كنت اتونست بصوت معقول, خصوصا' عندما يكون الطرف الأخر قاعد جنبك في نفس الكنبة.. و يا حبذا عندما يكون الطرف الاخر ساكت..
كنت امتنعت عن التدخين في منزل شخص اخر, او على الاقل استأذنت قبل ما تولع..
.كنت ترددت في ارسال حاجات وزنها خمسة كيلو و ما فوق مع كل من تسمع بأنه ماشي السودان...
كنت رجعت القروش الاستلفتها في وقتها, أو في الحقيقة رجعتها و بس..كنت امتنعت عن زيارة احدهم في مكتبه , للونسه او مناقشة امور لا صله لها بالعمل
كنت خجلت من عدد المسكولات التي تعملها, مش كمان تقول 'شنو يا فردة, خمسه مسكولات ما ترد عليها؟ و الله الفيك اتعرفت'.....
كنت حا تقعد فى صالون الناس بدل تلوص فى البيت كلو..كنت حا تبطل التحشر فى خصوصيات الناس وتعمل الحالة واحدة وتدى نفسك الحق تسأل اى سؤال يخطر فى مخك( لو كان فى يعنى) ..
كنت ما حا تمشي مستشفى الولادة وتقعد تحقن النسوان الفى العنبر كلهم واللللللللللله عيب كبير يا سودانيين اصلا ما شفت غيركم بتحاوم فى عنابر الولادة وكمان معاها هرجلة وإزعاج ..اصلا انتو البوديكم شنو مستشفي الولادة؟؟ عشان تودو نسوانكم اوكي آمنا بالله طيب اقعدوا في الاستقبال لزومو شنو الحوامة في العنابر يعني حبكت تباركو للام استنو لمن تطلع في البيت أما لو كانت اختك او زوجة اخوك يا ريت الزيارة تكون من طرف الاوضة وتتوكل علي الله ... ولو ما كنت سودانى كنت بطلت تطلع بالعراقى والسروال والسفنجة وراسك مكشوف وصوتك يجيب الطاش..لو ما كنت سودانى ما كنت اكلت ميراث اخوانك الصغار واستوليت على بيت ابوك لى يوم يبعثون عشان بس انت الكبير!!ولو ما كنت سودانى كنت إبتكرت فى خريطة بيتك بدل تشف حقت صاحبك بالكربون
وكنت استثمرت فى حاجة غير الركشة !! ومحلات الاتصالات !!لو ما كنت سودااااااااااانى ما كنت سوقت معاك كتيبة وانت ماشى المطار وما كنت عملت الضوضاء والغوغاء العجيبة البتعملوها فى المطارات ولابسين الجلاليب والبراطيش وراسكم كاشف وفي احسن الاحوال لابسين طاقية ويوم تحبو تقشرو تلبسو مركوب نمر يقزز .. ونسوانكم معنكشين بى دهب البيت كلو ولابسين الاحمر والاخضر والترتر وزفة الوان ما شوفناها حتي في اعتي صحن سلطة ده غير شباشب الظار البرتقالي والليموني وهلمجرا وشفعكم يكوركو ويتساككو ده غير التحنيس والدناءة عشان يمشو ليك الوزن !!! ولو ما كنتو سودانين كنت قعدتو محترمين فى الطيارة وما قرفتو المضيفات بي الطلبات والاصوات والمشية والجية والهمجية وبكاء الشفع والشنط والكراتين والصفايح الداخلين بيها الطيارة والاصوات العالية والجلاليب الشربانة وما كان نسوانكم غيرو التياب فى الطيارة وما كنتو فكيتو الاحزمة ووقفتو قبل الطيارة تنزل.
لو ما كنت سودانى ما كان ممكن تدخل فى زول شمال وتقول ليهو راتبك كم؟؟؟؟ولو ما كنت سودانى ما كان ممكن تفكر انك تمشى عرس بتاع ناس وتقيف بكل بجاحة تصور العروس بى موبايلك وانت ما بتقرب للعروس ولا حتى بى حواء وآدم بدون ما تسأل نفسك منو الاداك الحق ده في إختراق خصوصيات الناس ومنو السمح ليك تدخل وتتعشي وتصور!!!! ..ولو ما كنت سودانى ما كنت طلعت من شغللك ولمدة تلاتة ايام وسبت المراجعين يتبهدلو عشان حبوبة جار جاركم ماتت عن عمر يناهز المية وشوية والبكا جاى خبر من الشمالية.. والمراجعين برضو لو ما كانو سودانيين ما كان سكتو عن حقهم وكل يوم يمشو ويجو المؤسسة عشان موضوع تافه ما بياخد اكتر من عشرة دقايق!!!
لو ما كنت سودانى كنت استفدت من غربتك وامنت مستقبل اولادك وقدمت استقالتك ورجعت بلدك بي كرعينك مش بالصندوق..لو ما كنت سودانى ما كان كل يوم جاييك تلفون رسل وجيب وحول عشان هم يقعدوا ياكلو فى حقك لا شغل لا مشغلة ويشتغلو ليه؟؟كفاية عندهم سودانى مغفل زيهم يرسل بدون تفكير .
.ولو ما كنت سودانى مستحيييييييييييييييل تدى اخوك يبنى ليك بيتك وترجع بعد خمسة سنين تلقاو لسة ما حفر الساس ولو سألتو عن القروش الحولتها طول السنين دي يزعل منك ويخاصمك ويعملها حكاية طويلة وعريضة ولو ما كانو اهلك زااااتهم سودانييين ما كان غلطوك وطلعوك انت الكعب!!وجبروك تسكت عن حقك وطلعت من الموضوع بي ازمة نفسية!!
صدقنى لو ما كنت سودانى كانت حياتك مشت بى اريحية ونظام ورااااااااحة كانت مجاملاتك حا تكون حلوة وفى حدود المعقول بدل كل يوم جاري ولاهث من بيت لي بيت في الفارغة والمليانة!!..كنت نمت لما تحب وتصحى لمن تحب.
.كنت انت القررت مشروع زواجك بمن تحب بدل القبيلة كلها تقرر معاك..ويجزمو بأغلظ الإيمان انو فلانة هي البتناسبك !!!عرفو احتياجاتك كيف؟؟ميولك كيف؟؟طلبك كيف؟؟ انا ما عارف!!!!!. كنت سميت اولادك الاسماء البتحبها مش البختاروها ليك عمك وجدك ونسيبك وتقوم الدنيا وما تقعد لو ما سميت ليهم الاسم الدايرنو ويسلبوك ويسلبو الام ابسط الحقوق انها تسمي الكائن الكانت شايلاو تسعة شهور وتعبانة فيهو ده!!! .
كنت استمتعت باجازتك وبى وقتك وحياتك بدل كل واحد يديك الفتوي الفى دماغو..لو ما كنت سودانى كنت حا تكون سييييييييييد نفسك ووووووووووووووووووووووووووووووووووووو.


**********************


الرجاء إضافة وجهة نظرك....



كنت حسنت اسلوبك شوية ..وقلت كلام حلو (إضافة ومشاركة)


الله لو ماااااااااااااااكنت سوداني (امنية عزيزة)


كنت ارتحت من المجاملات الاتلفت اعصابي دي (احلام يقظة)


كنت خليت اسلوب الامر والنهى (مشاركة)



كنت اهتميت بى اولادك اكتر من الضيوف يا زول "إضافة"


كنت استمتعت بى ماهيتي برااااااااااااااااااااااااااااااااااااااااااااي " واحد موجوع"


علي الطلاق بالتلاتة لو ما كنت سوداني كنت رجعت السودان !!!!!!!!! "أفهموها براكم"


لو ما كنت قشراني ما كان ضغطي ارتفع من مناظر القشرانين المبهدلين البشوفهم في الشارع (واحد قرفان)


لو ما كنت سوداني كنت ارتحت من القناة السودانية المشغلاها مرتي ليل ونهار وكنت ارتحت من الالوان النارية بتاعت المذيعات واهم حاجة كنت ارتحت من المذيع الاسمو اساااااااااامة الخليفة((واحد مستاءءءءءء من تلفزيون السودان))


يا أبو الشباب اسامة الخليفة برااااااو؟؟؟وايمان ......... ((استغفر الله العظيم)) وغيرهم وغيرهم والهبل بتاعين فرق الكوميديا القايمين ليهم في عباطة جديدة ديل والاماكن الاعبط البصورو فيها والوساخة وعربات الكارو والركشات ووووووووووووووووووووووووووووووووو الوجع كتيييييير((واحد ممغوس))



كنت حا انوم في سريري!!!ما تستغربو !!! طول الوقت كان معانا ضيوف مأخدين سريري "واحد مغيوظ"


كنت..... ولأ مافي داعي.(واحد خواف)


كنت ح تهتم بمظهرك وإنت حايم فى الشارع مبهدل ومنظرك لا يوحى لأى شخص بإحترامك "إضافة"




(الأخ السودانى الكريم..... لو تزكرت أى عيب فينا أرجو إضافته مشكوراً لا لكى نفضح


أنفسـنا و لكن لكى نرى أنفسـنا بوضـوح و شـفافية )



الموضوع منقول بحذافيره للمشاركه

_________________
[i:75af]رحمة الله الطيب ابوقرون[/i:75af]


عدل سابقا من قبل رحمة الله ابوقرون في الثلاثاء ديسمبر 01, 2009 8:55 pm عدل 1 مرات
الرجوع الى أعلى الصفحة اذهب الى الأسفل
إيـــمه
عضو
عضو


عدد المساهمات : 18
نقاط : 5900
السٌّمعَة : 0
تاريخ التسجيل : 06/10/2009
العمر : 23
الموقع : إلسعــــــودية ..

مُساهمةموضوع: رد: لوماكنت سوداني !!!   الثلاثاء ديسمبر 01, 2009 7:30 pm

ههههههههههههههههه


وألله كلآم مية مية ,, خصوصآ إحنــآ ألبنآت بنعآني من ألموضوع دآ معآنآة مآآآآعآدية

لو مـآكنــآ سودآنيين مآكآن ولد خآلتي وللآ ولدعمي دخل غرفتي بكل عفوية وشال حاجة عاوزها وطلع ولا كأنو في حرمة هنــآ ,, لو مــــآ كنآ سودآنيين مآكآنت أعراسنا كلهــآ مختلطة نتعب عشآن نعرف نلبس كيف وشنو وألبس طرحة في عرس أختي ولاأخوي عشآن العفوية .. ويقول ليك مآفي مشكلة أخدي رآحتك أولآد أهلك .. يآنآآآآآآآآآس لكن حسآب ربنأ وديتوه وييييييين ,, ونسه مع أولآد خآلآتي كأنهم أخوآني وهم أاسآسآ مآيحل ليهم ولآ حتىآ يسمعوآ صوتي Evil or Very Mad

سبحــــــــــــــــآن آلله ,, آلله بس يهديهم ويصلح بآلهم ,,

موضوع روعٍه وألله وفي آلصِميم يآعمو ,, مـــآ قصرت ّّ


تحيآتي ,,
الرجوع الى أعلى الصفحة اذهب الى الأسفل
رحمة الله ابوقرون
عضو خبير
عضو خبير
avatar

عدد المساهمات : 431
نقاط : 6619
السٌّمعَة : 0
تاريخ التسجيل : 23/09/2009
العمر : 51
الموقع : شركة بترودار لعمليات البترول

مُساهمةموضوع: رد: لوماكنت سوداني !!!   الثلاثاء ديسمبر 01, 2009 8:35 pm

ايمه
سعيد جدا بمرورك ومشكوره علي الاضافه وربنا يخليك

_________________
[i:75af]رحمة الله الطيب ابوقرون[/i:75af]
الرجوع الى أعلى الصفحة اذهب الى الأسفل
رحمة الله ابوقرون
عضو خبير
عضو خبير
avatar

عدد المساهمات : 431
نقاط : 6619
السٌّمعَة : 0
تاريخ التسجيل : 23/09/2009
العمر : 51
الموقع : شركة بترودار لعمليات البترول

مُساهمةموضوع: رد: لوماكنت سوداني !!!   الأربعاء ديسمبر 02, 2009 8:20 pm

بسم الله الرحمن الرحيم
نحن نحب بلدنا بقوه وبالتالي لانحب المظاهر التي تشوه صورتنا اوتنقص من قيمتنا ونحب دائما ان يمثل السودان خير تمثيل, وهذاالموضوع يركز علي بعض السلبيات والتي ربما ذكرها يلفت النظر الي مدي المضايقه والاحراج التي تسببها وبالتالي ربما تساهم في علاجها

_________________
[i:75af]رحمة الله الطيب ابوقرون[/i:75af]


عدل سابقا من قبل رحمة الله ابوقرون في الثلاثاء ديسمبر 15, 2009 8:25 pm عدل 2 مرات
الرجوع الى أعلى الصفحة اذهب الى الأسفل
هشام سعد الطيب
عضو محترف
عضو محترف
avatar

عدد المساهمات : 657
نقاط : 7332
السٌّمعَة : 17
تاريخ التسجيل : 25/08/2009
العمر : 45
الموقع : (أين ماتكونوا يدرككم الموت )

مُساهمةموضوع: لوما كنت سوداني ..!!   الأربعاء ديسمبر 02, 2009 9:44 pm

مشكور النقيب أمن معاش / رحمة الله على الموضوع وفي رأيي هذا بمثابة سؤال لي أن هل كنت أحب أن تكون جنسيتي غير سودانية ..!! في البداية أنا لم أتخيل ولن أتشرف أن أكون من مواطنى قرية غير أبوقرون ناهيك عن السودان طبعاً بإثتثناء

(مكة المكرمة لانها أحب البلاد للرسول صلى الله عليه وسلم والمدينة المنورة لأنها أحب البلاد لله جل جلاله)

وحبى للسودان وإغتزازي به لا أستطيع أن أصفه أكثر من وصف الشاعر إسماعيل حسن الذي قال عنه :-

بلادي
******
بلادي أنا
بلاد ناسا في أول شئ
مواريثهم كتاب الله ،
وخيل مشدود،
وسيف مسنون حداه درع،
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتضرع وليها ضرع ،،،
وساقية تصحّي الليل مع الفجراوى..
يبكى الليل ويدلق في جداولو دمع
يخدر في بلادي سلام ..
خدرة شاربي موية النيل ..
تزرد في البوادي زرع
بلادي أنا بتشيل الناس وكل الناس
وساع بخيرها لينا يسع،
وتدفق مياه النيل علي الوديان
بياض الفضة في وهج الهجير بتشع،،،
بلادي سهول ،،بلادي حقول،،
بلادي الجنة للشـافوها ،أو للبرة بيها سمع ،،
بلادي أنا بلاد ناساً تكرم الضيف
وحتى الطير يجيها جيعان
ومن أطراف تقيها شبع ،،
بلادي الصفقة والطنبور ،،
وبنوتاً تحاكي الخيل
،يشابن زيي جدي الريل،
وشبالن مكنن في طريفو ودع ،،
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
البقيف في الداره وسط الداره
وأتنبر وأقول للدنيا ديل أهلي
عرب ممزوجة بي دم الزنوج الحارة..
ديل أهلي
ديل قبيلتي لما أدور أفصل للبدور فصلي..
أسياد قلبي والإحساس
وسافر في بحار شوقم زمان عقلي
أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا معايا زي ضلى
لو ما جيت من زي ديل..
كان أسفاي وأسفاي وآمأساتي وآذلي.
تصور كيف يكون الحال
لو ما كنت سوداني وأهل الحارة ما أهلي
تصور كيف يكون الحال؟


Evil or Very Mad Evil or Very Mad Evil or Very Mad Mad Mad Sad Sad
الرجوع الى أعلى الصفحة اذهب الى الأسفل
رحمة الله ابوقرون
عضو خبير
عضو خبير
avatar

عدد المساهمات : 431
نقاط : 6619
السٌّمعَة : 0
تاريخ التسجيل : 23/09/2009
العمر : 51
الموقع : شركة بترودار لعمليات البترول

مُساهمةموضوع: رد: لوماكنت سوداني !!!   الأربعاء ديسمبر 02, 2009 10:25 pm

اني اري ماترون
مشاركة رائعه اخي هشام وهي في ميزان وطنيتك وغيرتك الشديده علي وطننا الحبيب
ولكن نظل نكرر ونقول ان هنالك بعض التصرفات والسلبيات لايخلو منها اي مواطن من اي جنسية كانت
عربي اجنببي اوغيره ونحن طبعا يهمنا بالدرجة الاولي سوداني بلدنا , وهي دعوة لكي نرتقي بتصرفاتنا بقدر هذا الوطن الحبيب , ولكن لاننسي ان السودانيين يمتازون بصفات يشهد لها العالم اجمع من حسن الخلق والكرم والشجاعه وطيب المعشر ..................وووووووووووووووو.الخ وبكن الكمال لله

_________________
[i:75af]رحمة الله الطيب ابوقرون[/i:75af]
الرجوع الى أعلى الصفحة اذهب الى الأسفل
المحاسبي سعد ابوقرون
عضو خبير
عضو خبير
avatar

عدد المساهمات : 408
نقاط : 6678
السٌّمعَة : 6
تاريخ التسجيل : 04/09/2009
العمر : 27
الموقع : ماليزيا

مُساهمةموضوع: رد: لوماكنت سوداني !!!   الأربعاء ديسمبر 02, 2009 10:53 pm

واحد اكان بحكي لينا هنا في السفارة وبعدين اكان بقرا في لندن وهو كان في اتحاد المسلمين هناك وبعدين يوم اكان بتكلمو في موضوع كده قالو اذا قامت الدوله الاسلاميه من جديد محل الخلافه حايكون وين فواحد جزائري ولا سوري مامتأكد هو كان الرئيس حق الاتحاد قال انا اتوقع انها تكون في السودان الناس طبعا زعلت باقي الجنسيات قال والله ماشقت في العالم كلو زي السودانيين في الصفات الاخيرة الذكره رحمة الله عمي وطبعا كان ماسك اتحاد مسلمين في كم دوله.
وتحياتي
الرجوع الى أعلى الصفحة اذهب الى الأسفل
سمويه
عضو نشيط
عضو نشيط
avatar

عدد المساهمات : 106
نقاط : 6067
السٌّمعَة : 4
تاريخ التسجيل : 07/09/2009
العمر : 31

مُساهمةموضوع: رد: لوماكنت سوداني !!!   الأربعاء ديسمبر 16, 2009 2:36 am

نقول كده .... تطلعونا ماعندنا وطنية ولا شنو يا هشاااااااااام



الكلام الفات ديهو صح كتير لكن ماقدر دا ياخ الزول دا عندو صدمه نقسية مزودا شويه !!!


ماعارفه لكن الكلام مزعج


مع اني الله لو ماااااااااااااااكنت سوداني (امنية عزيزة)

هع هع هع ماشديد والله


لو ما كنتا ............... ماكان ريحتك حتجيب ناس المريخ (يع)

لو ما كنتا ............... ماكان لئامتك طلعو فيها نكات

لو ماكنتا ................ماكان الناس بتضحك فيك لانو متخلف ومسيييييييييييخ وبايخ

ولسا في كتير

الحمد لله اني سوداني لكن 50% بس
الرجوع الى أعلى الصفحة اذهب الى الأسفل
هشام سعد الطيب
عضو محترف
عضو محترف
avatar

عدد المساهمات : 657
نقاط : 7332
السٌّمعَة : 17
تاريخ التسجيل : 25/08/2009
العمر : 45
الموقع : (أين ماتكونوا يدرككم الموت )

مُساهمةموضوع: لو ماكنت سوداني !!!   الأربعاء ديسمبر 16, 2009 5:27 pm

كلامك في محلو أخي رحمة الله ومشكور العزيز المحاسبي الذي أكد مارميت إليه ..
أما إنت ياسموية فالحمد لله باسيتي ونجحتي فال(50%) كتييييييييييرة تب يبقصوا منها وماتنسي اصلك شكرية حرة نجييييضة وزيدابية (100%) وعلى العموم البشتنة والمحن والعشوائية واللأمبالاة الله يحلنا منها ويعافينا لكن (يس) عايزة جكة شوية يعني كل واحد يبدأ بنفسه بعد شويتين حالنقى هنالك تقدم ملحوظ .

الرجوع الى أعلى الصفحة اذهب الى الأسفل
سمويه
عضو نشيط
عضو نشيط
avatar

عدد المساهمات : 106
نقاط : 6067
السٌّمعَة : 4
تاريخ التسجيل : 07/09/2009
العمر : 31

مُساهمةموضوع: رد: لوماكنت سوداني !!!   السبت ديسمبر 19, 2009 4:16 am

زيدابية ؟؟

دي بي جهة امي ولا ابوي ؟؟


صح كل زول يبدا بنفسو وانا نويت خلاص اي تصرف كده ولا كده ادوني في راسي... Suspect
الرجوع الى أعلى الصفحة اذهب الى الأسفل
سردوب الطيب فرح
عضو خبير
عضو خبير
avatar

عدد المساهمات : 215
نقاط : 6233
السٌّمعَة : 3
تاريخ التسجيل : 22/08/2009
العمر : 44
الموقع : الرياض

مُساهمةموضوع: رد: لوماكنت سوداني !!!   السبت ديسمبر 19, 2009 1:45 pm

السلام عليكم ورحمة الله تعالى وبركاته
مشكور الأخ رحمة الله على الموضوع المميز الجميل
نحنا في خارج السودان بنسمع نكات كتيرة عن الصفات السودانية مثل الكسل وعدم الالتزام بالمواعيد
في واحد سعودي قال لي انتو السودانيين ديل نافعاكم الأمانة تاني ما عندكم أي حاجة شينيين وزهجانييين وأخلاقكم ضيقة وكلمة والتانية الواحد بضارب

_________________
اللهم صلي وسلم على سيدنا محمد وعلى آله وصحبه وسلم
الرجوع الى أعلى الصفحة اذهب الى الأسفل
رحمة الله ابوقرون
عضو خبير
عضو خبير
avatar

عدد المساهمات : 431
نقاط : 6619
السٌّمعَة : 0
تاريخ التسجيل : 23/09/2009
العمر : 51
الموقع : شركة بترودار لعمليات البترول

مُساهمةموضوع: رد: لوماكنت سوداني !!!   الأحد ديسمبر 20, 2009 1:13 pm

هاهاهاهااهاهاهاهااهاهاهاهاهاهاهاهها
عودا حميدا بردوس سعدت جدا بسماع قلمك الذي افتقده والله اضحكتني بشده

_________________
[i:75af]رحمة الله الطيب ابوقرون[/i:75af]
الرجوع الى أعلى الصفحة اذهب الى الأسفل
thaqip



عدد المساهمات : 6
نقاط : 5866
السٌّمعَة : 0
تاريخ التسجيل : 13/10/2009

مُساهمةموضوع: رد: لوماكنت سوداني !!!   السبت يناير 02, 2010 1:21 pm

سلام الله عليكم

بعد التحايا واطيب الامنيات
وبالنظر للجانب الملئي من الكوب فانا سوداني ويزداد الاحساس بالسودان وقيمة الوطن السودان وبني السودان كلما خالطت غيرهم وبالمقارنة تفخر بانك من قوم هم سودانيون..
ولكل جنس مميزات وخصائص يمتاز بها ولكن لم اجد من يكرم الانسان لذاته ودون اي مقياس لمصلحة او هدف من وراء التعامل غير بني السودان..
وصلني الايميل التالي بعنوان : لومالقيت نفسك هنا معناها انتا ماسوداني !!!


لمن تقيف مع ناس الحله في الوفيات وتمشي المقابر وتحفر وترجع تقيف في الصيوان
وماتخليهم يطبخو في اليوم داك انت سوداني
لمن تفرح لعرس صاحبك وتحنن يدك معاه انت سوداني
ولمن توصل جاراتك لبيوتن وتحافظ على عرضهن انت سوداني
لمن تفارق اهلك تبكي ولمن تقابلهم تبكي انت سوداني
لمن تكون طالب وقريبك يعصر ليك مبلغ في يدك أنت سوداني
لمن تساعد اخواتك واخوانك اول ماتشتغل انت سوداني
لمن تمرض وتسمع الضيفه تقول ُكوورعلي وسجمي مالو
عيان انت سوداني
لمن تقبل كل الغرباء يعيشو في بلدك انت سوداني
لمن تلاقي الرئيس والقيادات السياسيه ماشين في الشارع وجنبك في الجامع
ويبشرو في الاعراس ويعزو زيك في المأتم انت سوداني.
لمن البيت يكون فيهو كل اطياف اللون انت سوداني
لمن صاحب ابوك اقول ليك ياود اخوي انت سوداني
لمن زول يقول ياأبومُُروه وكل قادر يبادر انت سودني
لمن يقولو في حرامي في الحله وتطارده كأنو سرق بيتكم انت سوداني
لمن تقول ده اخوي ودعمي وله اخوي ودخالتي انت سوداني
لمن تقول لكل كبير في الحي ياعم وياحاج انت سوداني
لمن تقول للجيران عندي ضيوف ادوني شوية كسرى وملاح انت سوداني
لمن تقول للجده حبوبه وللعريس ابشر انت سوداني
لمن تدق باب بيت وتقول انا عطشان وتشرب انت سوداني
لمن يدركك الفطور في رمضان في الشارع والناس تجرك من
يدك ويقولو ليك لازم تفطر انت سوداني
لمن تُحتَرم في بلاد المهجر ويقولو عنك امين بالرغم من
نعتك باالكسل انت سوداني
الرجوع الى أعلى الصفحة اذهب الى الأسفل
 
لوماكنت سوداني !!!
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات الشيخ ابوقرون :: المنتديات الادبية :: منتدى النقاش الحر-
انتقل الى: