[b]الشايقي اللي انسرق [/b]

يعيقك الله يا مجرم ... وكيف اسّع تصدقني؟.. وتسرقك بطنك إن شاء الله وتخليك ديمة متألم ... حِضَير إن شاء الله يبراكا وفلساً للجيوب يخدم ... والعطش اليحرّق الجوف يخلي الفُقرا قايمة وقاعدة ليك تعزم ... تعيقني أنا ؟ يعيقك الله يا مجرم ... بي مدفع كلاشنكوف يواليك في المسيمع عاد يخليك لا سمع لا شوف ... ويجيك عميل من السوفيت مرسلوا ليكا قرباتشوف ... شايل حقنة حارقة معاهو يحرق ليكا قلبك وكبدك وحتى المعدة والشارشوف ... تعيقني أنا ؟ نان بالله لو سألوكا نان عميان من الأسواق ... تسوق أروتي في ساقي دوره يقطع الخناق ... تسوق لك داب تدقشوا ترلّه في عقبه يخليك لا ظهر لا ساق ... نان بالله لو سألوكا ماك عارف القروش بي وين ؟.. ناس بانيين عمارات كيف وناس راحات وناس تخزين ... حكَمتّه تجيني انا المسكين ؟.. البلقط بي قرش وقرشين ... تقرشك عقرباً تلقاك فوق الريق يكون جسمك مرطّب تبّ ... تقرشك سمُوم الصيف تخلي وشيشك قايم حب ... وقرشاً يبلعك يزري عيني البي جده والصومال يجيبك لينا تاني هنا ... يرميك في الرصيف بي جاي يسلب لحمك الفوقك يخليك بس عُظام وعصب ... تعيقني أنا ؟.. تطرشق ليّا برنامج أخطط فيهو ليّا سنين يطرشق فيكا كمبرسون يخليك إنت بس ساردين ... ويطرشق فيكا بتجازاً يكون جنبك صفيح بنزين ... وترقد ما نشوف لنا زول يقولنا ماشي في تحسين ... تعيقني أنا ؟.. كمان تسرق ملاياتي الِمنْ كِيسه ما انفكت ولا عارف نقوشن كيف ... يفكك مننا الله اليوم قبُل باكر يخليك لاااافي صيف وخريف ... يفك ضُلعك ... تفارق عقلك ... تسُك الماشي فوق عدلَكْ ... زي جملاً عشاهو الزيف ... نفسك فااااتحة وترقد فوق ملااااياتي ؟.. ترقد يابا في قبراً نصيحو يشابي كاي سيدو ... ترقد يابا في عنبر نصيحو يشابي كاي سيدو ... ترقد يابا في قبراً أعوذ ربي من هولو وعذاب سيدو ... ترقد يابا في غرفة تكون مبروشة بالصُرفة ... ونمِله يخموا بالقُفة ... ولا تشوف جنة بي عينك ولا في العتبة تتعتب ... عشان عملك تملي كعب ... تسرق الجيب تسوي العيب ... إنتا حرامي ود الكلب ... إنتا حرامي ود الكلب .