عووووك ياهو .. الناس دي وينا؟؟؟؟؟

كانت الدنيا صيف نص النهار، طل علي الفريق ضيف ، والفريق عادم الصيحة والجو كارس مافيهو نسمة ، حام الضيف بين البيوت ويعاين يمين وشمال ويجرجر رجليه بالارض ( كرش كرش ) ويتنحنح ( احم احم ) علشان يسمعوا ناس الفريق ويقولو مرحب اتفضل بالمقيل ويرتاح من هجير القايلة، لكن الناس ما جايبة خبر النايم نايم والحايم بالخلا حايم ، لمن غلب من المساسقة وقف وكورك ( كووووك ياناس ياهوووو .. الفريق دا مافيهو ناس ولا شنو ؟؟؟ )وتاني كورك ( كووووك ياناس ياهوووو .. الفريق دا مافيهو ناس ولا شنو ؟؟؟ ) واتلفت جاي جاي ،بعد مسافة مرق عليهو صبي صغير قائم من النوم .
الكلام دا كلو والعنوان دا ياهو الحاصل علينا في منتدانا العامر ، اخذتني بعض مشغوليات وابعدتني كم اسبوع كدا ولما طليت على المنتدى وجدته كاني ضيف الفريق الفي الخلا والصي ( واللبيب بالاشارة يفهم ) ، الحاصل شنو ياجماعة وينكم ومالكم انقطعتوا انشاء الله المانع خير وصيفنا يبقى خريف والسبعين عضو يلبو الصيحة كلهم يا نصهم ، فلنتواصل ولنشجع بعضنا البعض لاتّلكوا ولاتملّوا واعطوا منتداكم شيء من وقتكم