(
- والله الناس ديل انا اقنعتهم بعد صعوبة لكن لي هسا
هم ما مقتنعين وشايفين القصة ما بتجي يمشوا يد قدام ويد وراء
- يعني ما حا يجوا
- لا ما كدة بس بصراحة كدة ما مقتنعين انه يمشوا مع ولد لسة بيقرأ
وكمان الحتة بتاعة إنه انتو تتكفلوا بي كل حاجة دي وهم يجوا يد قدام ويد وراء شوية مأزماهم
- انت ما شرحت ليهم
- اكيد بس هم شايفين القصة قصة كرامة... والناس ديل رغم فقرهم إلا إنه عندهم كرامة فايتة الحد
وشايفين إنهم حا يجوكم عشان خاطر ولدهم .. يعني ما برضاهم
- ممكن انا امشي اقابلهم
- بيعتمد على الشئ العايزة تقوليهو ليهم
- انا بس عايزة اشرح ليهم انه نحن النسوان بس العارفين الأمور حا تمشي كيف...
لانه رجالنا ما عارفين انه خالات البت هم الحا يشتروا كل حاجة... الدبل وامور الخطوبة كلها... حتى لبسة عوض من عندي انا
- والله أشوفهم وأرد عليك... بس حاولي إنك تفهمي نفسيتهم..
يعني لو حسوا انك بتجرحيهم حا تبوظي القصة كلها...
- هو ولد عمها دة ما حاسس إنه البت ماعايزاهو..
- حاسس بس هو مُصر
- ياخي الموضوع دة عجيب من أوله
- قالوا لي إنك معترض
- أنا ما معترض ولا حاجة ولا عندي الحق دة... بس أنا بعرف أهل عوض كويس..
ناس طيبين وفي حالهم.. ومنتظرين عوض دة ينتهي متين عشان يساعدهم مع أخوانه
- كل شئ حا يتسهل..
الشئ الحارقني وفاقع مرارتي عوض شغال يتبسم ويكب في الجلكسات مع القرمبوز
ومرة مرة يخت يدو في خدو تقول عايزين يصوروهو في جنةالأطفال
وأخت الجكس تراقب فينا أنا وخالتها زي رئيس العمال
- انت ما شايفة إنه الموضوع غريب
- غريب... بس بتنا بتحب الولد شديد وأخير لينا تعرسوا بي رضانا وقدام عينينا من تعرسوا من ورانا
- عوض زول كويس شديد
- انا عارفة كدة كويس... عشان كدة نحن عايزين نشتري راجل... عندك اعتراض
- ابدا ابدا
- انت ماعندك مشروع زواج كمان
أها بدينا في الكلام الأعوج... كان كدي نقوم نمشي...
- لسة بدري.... المشوار طويل
- يعني ما عندك جكس
يا النبي نوح... بدينا في جرجير الكلام والبحيت
- لا على باب الله
- يعني مافي واحدة عاجباك
- حتى لو في حا يكون الموضوع سراب ساكت
- ياخي إنت ليه متشائم كدة
- ما متشائم بس تقدري تقولي عارف حدود الحاجات العندي كويس وما عايز اتشعلق في الهواء
- حتى لوفي ناس انت عاجبهم شديد
أهاااااااااااااااااا
يا سيدي الحسن.....
يوم بالمساء اسمع صوت الحاج من الشارع مع العصرية بيكورك:
- يا طارق في جماعة عايزنك
ألقى ليك خالة البنية ومعاها واحدة تانية وعربية تقول يا ليل والله جنسها شنو ما عارف...
والله يستر الحاج خلى قراية الجريدة وبقى يشوف فينا
- سلام يا طارق
- وعليكم السلام
- ياخي نحن قلنا نسأل منك في الأول عشان إنت تدخلنا لي أهل عوض ودي اختي محاسن
- ما في مشكلة انتظروني دقيقة
دخلت لقيت خالة سكينة تعوس في اللقيمات
- يا خالة خليك من العواسة دي نسايب عوض جوا يشوفك
- النبي فوقك ياولدي
- أيوة قومي شوفيهم
ونواصل،،،،،،،،،،،،،،،،،
(9)
دخلت خالات البنية عند أم عوض ومشيت اقعد مع أخوانه
لأنه الحاج دة برة حا يبدأ يزرزر فيني برة عشان كدة اخير يزرزنا مع العشاء
......
شوية اسمع ليك يا طارق يا طارق
جيت جاري لقيت النسوان خلاص مارقين من جوة ويتبسمن
وأم عوض وأبوه مودعنهم لي برة.... شكلو كدة عوض خلاص اتورط
- أها يا جماعة فتناكم بي عافية ومن هنا اسبوعين تشرفونا وأنا قبليها بي كم يوم بجيكم براي
أبو الزفت الكلام دخل الحوش
- شوف يا طارق الناس ديل حايجوا يتقدموا رسمي وانت لازم تكون معاهم
يا النبي نوح... وأنا في شنو
- ياخي إنت صاحب العريس ووجودك مهم جدا
- ام عوض: هو لو ما مشى أنا ذاتي ما بمشي ياهو ولدي التاني
- يا حاجة تاني شنو قولي ولدك العشرين
وكلهم ضحكوا لي قعر اضنيهم والنسوان ركبن عربيتن ومشن
وأنا مشيت لي زرزير أبوي
... خلاص بقينا على المشي ليهم بعد أسبوعين
أها يا الحبيبين مرت الاسبوعين وبقينا في الكلام الجد
شفنالنا تلات عربيات وبوكسي عشان شفع ناس عوض ديل
انا اندرعتلي في بنطلون وقميص كان عاجباتني جايبن معاي من مصر
ومشيت من دولاب الحاج اتريحت ومشيت بيت ناس عوض
أها الرجال جاهزين.. خيلانه واعمامو اتنين واخوانه الكبار علي النسوان
ما جهزن لي هسا وأبوهو ينقنق في التأخير... ونحن ما عايزنه يحرِن...
- فجأة: يا طارق... طارق تعال... اخت عوض نادتني
- شنو يا حنان مالكم ما جهزتو لي هسا
- ياخي امي قالت إلا تشيل معاها حُقة الصعوط
- يا حاجة صعوط شنو كمان التشيلي معاك في العمارات
- نان يا ولدي إن بقيت خرمت هناك أسوي شنو
- كمان عايزة في يوم خطوبة ولدك تقنطري سفتك زي الكبريتة المفتوحة
- الله يقلعك.. نان ان خرمت اسوي شنو
- عضي طرف توبك
- طيب بدل ما اعضيهو ما اختلي فيهو سفايي فرد ويحيدي
- انت قايلاها حلاوة كرملي... امرقي انا اصلي عارفك خرفتي
- هو الشي الهسا ماشين نسوي دة ما ياهو الخرف ذاته
- سمح امرقي لامن نجي بوريك الخرف كيفنهو
... ومشينا يا الحبان.... تيت تيت تيت... لامن وصلنا العمارات
... اهلا مرحب شرفتو
... اتفضلوا اتفضلوا
دخلنا لقينالكم الدنيا هايصة... والبيت مليان رجال غلاد غلاد
النصايب تقول بياكلوا تِبِنْ منفخين زي شواويل الكاويق (شواويل مليانة بي ورق شجر المنقة)
... والنسوان سمحات ومتمرات عكس رجالن.. شوف عيني الواحدة فيهن تقول
للقمر قوم وأنا أقعد مكانك وباين عليهن مستلمات رجالن...
أما إن كان للقرمبوز أليلُم يمين من سماحتن
قلب الواحد ينتِل دق دق دق دق زي مروحة الطربيزة...
أماني صحبي ما وقعلو وقعتن سمحي خلاص...
أنا علي العلي مشيت أعاين في الحيط البنيناهن وبقلَنا سبب في الشي الحاصل دة
... جات جنبي خالة البنية: إنت ما عايز تنسى إنك طُلبة؟؟
- أنسى كيفن وهي كانت سبب الشي دة...
- امشي اقعد انا بعدين عايزاك
... يا سيدي الحسن تنجدني من المرة دي
شكلها كدي ناويالي علي نيي....
ونواصل
(10)
عوض انجعص جنب ابوهو... الحقيقة شكله اتغير بس يكتل من الضحك
لابسلو بنطلون رمادي وقميص ابيض وكرفته حمرا وجكيت رمادي
انا الكاتلني من الضحك الكرفته المشنطه في رقبتو دي.
... اتوهطو الرجال وبدواالكلام..
واحد من خيلان عوض قعد يفلعص في الكلام ويعوج فيهو...
انا في سري اقوله: ياخينا اكشح كلامك بسراع خلنا النمشي نشوف بوشنا.. الفلهمة العليك شنو انت جايي ايد ورا وايد قدام
المهم الزول قعد يطول في الكلام ويعوج فيه لامن وصل حتة: يشرفنا ويسعدنا إننا نناسبكم
يمين ابو البت بس قال: مرحب بيكم وشرفتوا... النسوان فقعن الزغاريد .... ايويييييييييي يو يو يو
انا طوالي عرفت إنه الرجال ديل قاعدين دلاليك ساكت..
وووب عليك يا عوض اماني ما وقعت وما سميت... انا خايف اجي القاك مزرزر زي أبين كروش ديل لا تهش لا تنش
... مبروك مبروك ربنا يكمل على خير
... شرفتونا والله بي وجودكم
... د. عوض في عيونا إنشاء الله
سبحان الله هو عوض متين بقى دكتور وهو لليلي الاسبرين ما كملو
.. المهم يا الحبان صواني الخبايز والعصاير بقن ينطاقشن وانا اسكت ابلع واشرب
اخدنا لنا صنه كدي عشان الجماعة يتعارفوا وجات خالة العروس قالت الشباب لازم يلبسوا الدبل
بس يا الحبان يجن خالات العروس وبنات خالاتها وبنات عمها مقدمات العروس والدنيا هاصت تاني
النصيحة لي الله البنيي سمحة سماح يكتلو زول
قعدوها هي وعوض في كراسي ماهلات كدي
وخالة العروس طلقت البخور وجابوا الدبل والحاجات
وعوض من شدة الفرح عيونو يتحركن زي البليه الخاتنها في كورية
لبسوا دبلم
وفجأة دخلت غنايتا غليييدا قالوا اسمها حواء قندران ولا ترلا ما عارف
الزولة دي قعدت تلعلع والشباب دة هاص وختوا عوض وخطيبتو في النص وهاك يا رقيص
خالة البنية جات جرتني من يدي ودخلتني الدائرة واختلي قلدي مع عوض شديدي والله من قلبي
وبدينا نسكسك وخالة العروس تلزني وسط البنات
وانا اقول يا ربي تمرقني سالم الليله
وفجأة شفتلي واحدا ليه فقهة كدي زي التلكي (الخشبة البيكسروا فيها الجزارين اللحم)
زولكم منجعصلو في كرسي واللحم عليه كتير لامن مدفق من الكرسي بس تقول عجين خميرتو ذايده نازل من الماعون
الولد عيونه محمره وشكل وشه ينعل قفاهو
ونحن في الهجيج دة وسط البنيات السمحات ديل
همست في اضان خالة البنيي: انت الزول المنفخ ابو نخرة كبييرا زي وحيد القرن دة منه ومالوفارز عيشتو بعيد من الناس كدي
ياخي حرام عليك... دة ما ود عمها الكان عايزها
اتاريهو يشرب في العصاير يبرد في جوفه وعيني ليهو قزازة الببسي يشرب فيها زي الماسورة المفتوحة في زير
حمدتك يا مالك روحي الما حبيت
- انت ما حبيت لكن في ناس عينها عليك
أهااا قمنا تاني... يا سيدي الحسن تمرقني لي أهلي سالم من العيلة دي...
واصلنا سكسكتنا وسط النسوان القاهرات ديل..
.. حاجة سكينة جات مسكت ولدها وقلدتو وبكت بي حرقة شديدة خلاص
والله تقول عوض مات....
انا سبيت لي عوض ولي قلبو ولي العمارات وللفقر
... خالة البنية غمزت لي عشان انقذ الموقف
جيت مسكت حاجة سكينة من يدينها وجبتها لي وسط الجكس البيرقص
وقعدت ارقص معاها وقلت ليها : انبسطي في خطوبة ولدك عشان اجيبلك سفة من أبان كروش ديل
والله قعدت ترقص وتضحك بي دموعها وطبعا الناس كلها مستغربة انا قلت ليها شنو
خالة العروس جاتني: النبي فوقك نسيبتنا دي قلت ليها شنو
- ياخي مالك مخصماني بالنبي الشي القلتو ليها ما بيتقال.. انت موش كنت عايزها تنبسط اها انا خليتا ليكم تحتو قرض
- (ضاحكة) انت باين عليك داهية... أها مافي واحدة من الشباب ديل ملت عينك
- انا عيني مليانة مصائب وبناتكم السمحات ديل ما بقدر عليهن... انا وليد ربراب وماني زول حب
وشيت عوض دة ان بقيت سويتو ابوي بيقطع راسي... هو جيتي مع عوض دي عندو فيها كلام
- بس نسوي شنو جيتو خليتو بناتنا يهضربن
يا ود الكرسني تحلني الليلة دي من الزرزير دة
انا كان عارف القصة حا تصل لي كدي كان شفتلي بناي جالوص واشتغلت معاهو
- شايف الزولة اللابسة احمر ديك... شايفها متابعاك كيف
يا سيدي الحسن... اقولك حاجة... تعالي نرقص انا ما مني فايده
- يلا... بس ما بنخليك
عوض يوزع في البسمات وغاتس في بدلتو زي قلم البيگ
مشيت قعدتة بينه وبين العروسة
- والله بي طريقتك دي بتكتلي ليكي زول... ليك حق تجهجهي عوض
- بس هو الجهجهني... وعوض دة حاجة روعة
عوض يتبسم ساكت زي الماسكين جضومو بي مشبك
- انت الزول الهناك دة ياهو الاخد الشاكوش...
الإثنين فبراير 22, 2010 12:50 am من طرف القروي
موضوع: قصة طارق جبريل وعوض 
